Այսօր «Միրհավ» հյուրանոցային համալիրի Impact Hub Syunik սրահում տեղի ունեցավ քարտեզագետ Ռուբեն Գալչյանի «Հայաստանի սահմանների 2600 տարվա պատմությունը (աշխարհագրական, քարտեզագրական և պատմական փոփոխությունները)» գրքի(Ե., Զանգակ, 2022թ., 60 էջ) շնորհանդեսը: Գիրքը ՀՀ ԿԳՄՍ նախարարության կողմից երաշխավորված ուսումնական նյութ է, որի նպատակն է Հայաստանի սահմաններով հետաքրքրված հանրությանը և հատկապես ավագ դպրոցականներին պարզ ու դյուրըմբռնելի լեզվով ու քարտեզների պատկերներով ծանոթացնել Հայաստանի սահմանների պարբերաբար փոփոխություններին և դրանց հիմնական պատճառներին: Միջոցառումը կազմակերպվել էր «Միրհավ» հյուրանոցի տնօրեն, գրքի տպագրության աջակից Շահեն Զեյթունցյանի, Ակսել Բակունցի տուն-թանգարանի և Գորիսի երկրագիտական թանգարանի համատեղ նախաձեռնությամբ:
Շնորհանդեսին ներկա էին Գորիսի մտավորական հանրույթի ներկայացուցիչները, մանկավարժներ, աշակերտներ, ուսանողներ:
Բացման խոսք ասաց Բակունցի տուն-թանգարանի վարիչ Վարդան Սարգսյանը՝ ներկայացնելով օրվա հյուրին՝ գրքի հեղինակ, քարտեզագետ Ռուբեն Գալչյանին՝ խոսելով հանդիպման նշանակության ու կարևորության, գրքի արժանիքների, ինչպես նաև պատմաքաղաքական արդի մարտահրավերների մասին:
